АҚШнинг «Republic Wireless» алоқа компанияси ойига $5 дан $40 гача бўлган телефон хизмат пакетларини эълон қилди. Шунингдек, компания «Moto X» телефонини ҳеч қандай шартномасиз атиги $299 дан сотмоқда.
Хизмат ва телефон нархларининг бу қадар арзон эканининг боиси нимада?
Гап шундаки, компания тақдим этадиган телефонлар «Wi-Fi» интернет тармоғи орқали ишлайдиган махсус технология билан жиҳозланган. Агар телефонингиз «Wi-Fi» тармоғига уланган бўлса, қўнғироқлар интернет орқали амалга оширилади. Телефон интернетга уланмаган тақдирда эса, алоқа «Sprint» телефон компанияси тармоғидан фойдаланади.
Компания тақдим этаётган $5 лик пакетни сотиб олсангиз, барча чиқувчи ва кирувчи телефон қўнғироқларини интернет орқали амалга оширишингиз керак бўлади. $10 лик пакетда эса, интернет бўлмаган жойларда қўнғироқлар “Sprint” тармоғи орқали амалга ошади. $25 лик хизматда ўз «Wi-Fi» интернетингиз бўлмаган тақдирда, “Sprint” тармоғи орқали нафақат чекланмаган телефон қўнғироқларига, балки “3G” тезликдаги чекланмаган интернетга ҳам эга бўласиз. Агар ойига $40 тўлашга рози бўлсангиз, “Sprint”дан оладиган чекланмаган интернетингиз “4G” тезликда бўлади. Барча пакетларда кириш ва чиқиш қўнғироқлари минути чекланмаган.
