Буюк Британиядаги ватандошимиз Ўзбекистонда янги идорага раҳбар бўлди

Равшан Шавкатович Изамов Ҳукумат қарорига мувофиқ Ўзбекистон Республикаси Инновацион соғлиқни сақлаш миллий палатасининг раиси этиб тайинланди.

Эслатиб ўтамиз “Ўзбекистон Республикасида соғлиқни сақлашни бошқаришнинг инновацион моделини жорий этиш чора-тадбирлари тўғрисида”ги Президент қарори (http://lex.uz/docs/3846720)билан Инновацион соғлиқни сақлаш миллий палатаси ташкил этилган эди.

Халқаро стандартларга мос соғлиқни сақлаш инфратузилмасини яратишга, шу жумладан, тиббиёт ва фармацевтика ташкилотларини замонавий ускуналар ва илғор ахборот-коммуникация технологиялари билан жиҳозлаш Миллий палатанинг асосий вазифаcи ҳисобланади.

“Буюк келажак” экспертлар кенгаши сайтида ёзилишича, 1977 йилда туғилган Равшан Изамов Буюк Британия соғлиқни сақлаш — NHS (National Health System) тизимида фаол иш олиб борган. Қатор хусусий клиника ва тиббиёт муассасалари фаолиятини қўйишга бош-қош бўлган.

Экспертлар кенгаши вакили Ойбек Шайховнинг Facebook’даги саҳифасида ёзилишича, Равшан Изамов “соҳадаги ҳақиқий профессионал, нафақат юқори малакали шифокор, айни пайтда тиббиёт соҳасидаги ташкилотларни бошқаришда катта тажрибага эга”.