Японияда ҳибсга олинган ўзбекистонлик талаба озод қилинди

Япониядаги дўкондан 800 минг иена ўғирлашда гумонланиб, ҳибсга олинган ўзбекистонлик талабанинг айби исботланмади. Бу ҳақда Daryo.uz сайти хабар берди.

Жорий йил 26 сентябрь куни таълим олиш мақсадида Японияга келган Ўзбекистон фуқароси мамлакат дўконларидан бирида 800 минг иена (7 минг доллардан ортиқ) ўғирлаганликда гумон қилиниб, ҳибсга олинган эди.

4 октябрь куни унинг онаси Ўзбекистон ёшлари умумжаҳон ассоциациясига ёрдам олиш мақсадида мурожаат қилди. Ёшлар иттифоқи Избоскан туман кенгаши ва «Тараққиёт» маҳалла фуқаролар йиғини билан ҳамкорликда Японияга тавсияномалар йўлланди.

Ҳодисадан хабар топган Ўзбекистоннинг Япониядаги консули Эркин Тоҳиров, Ўзбекистон ёшлари умумжаҳон ассоциациясининг Япониядаги вакили Жўрабек Ҳасанов ва Япониядаги Ўзбекистон ёшлари ассоциацияси ишчи гуруҳи талаба ҳолидан хабар олиб, воқеа тафсилотлари билан қизиқди ва муаммони атрофлича ўрганиб чиқди. Адвокат билан ҳамкорликда Ўзбекистон фуқаросининг айбсизлигини исботловчи керакли ҳужжатларни тайёрлашда ёрдам берди.

2018 йил 17 октябрь куни ўзбекистонликнинг айбини исботловчи далиллар етарли эмаслиги сабабли у жавобгарликдан озод қилинди.