Америка қамоқхонасида унутиб қолдирилган талаба 4 миллион доллар товон пули олди

_69033393_69033385АҚШнинг Сан Диего шаҳридан бўлган талаба Даниел Чонг қамоқхонада тўрт кун унутиб қолдирилгандан сўнг ҳукуматдан 4 миллион доллардан ортиқ товон пули олган. Бу ҳақда унинг адвокати маълум қилган.

Даниел Чонгнинг айтишича, у ўша кунлари ўз чанқоғини қондириш учун ўз пешобини ичишга ҳам мажбур бўлган.

У 2012 йилда гиёҳванд моддаларга қарши курашиш бўйича ўтказилаётган рейд пайтида қўлга олинган ва унга айблов эълон қилинмаслигини айтишган. Аммо у сақланаётган қамоқхона ҳужрасига тўрт кун давомида ҳеч ким келмаган.

Даниел Чонг қамоқхонадан чиққач, беш кунини касалхонада ўтказади. У ўша кунлар давомида 15 килограмм вазн йўқотади.

У хато боис унутиб қолдирилганман, деб ўйлаганини айтади. “Худди жуда ёмон ҳалокат бўлганга ўхшайди. Шунинг учун мендан хабар олишмаяпти, деб ўйлаганман”, дейди у, жумладан.

Унинг адвокатига кўра, ушбу воқеадан сўнг Гиёҳвандликка қарши курашиш маъмурияти маҳбусларга нисбатан янги тартибни жорий этди. Унга мувофиқ, эҳтиёт чораси сифатида ушлаб туриладиган ҳибсхоналар ҳар куни текширилиши ҳамда ичкарига кузатув камералари ўрнатилиши белгиланган.