Ўзбекистон Республикаси Президенти Ислом Каримов “Ўзбекистон Республикаси давлат мустақиллигининг йигирма тўрт йиллик байрамига тайёргарлик кўриш ва уни ўтказиш тўғрисида”ги қарор қабул қилди. Унга кўра, жорий йилда Ўзбекистон Республикаси давлат мустақиллигининг йигирма тўрт йиллик байрами “Бетакроримсан, ягонасан, она Ватаним – Ўзбекистоним!” шиори остида нишонланади.

Қарорда “халқимиз асрлар давомида интилиб яшаган ва курашган, мустақиллик деган бебаҳо неъматнинг қадр-қимматини теран идрок этиш, ўтган давр мобайнида босиб ўтган оғир ва машаққатли, айни вақтда шарафли йўлимиз, кенг кўламли ислоҳотларимиз, қўлга киритган улкан ютуқларимизнинг туб моҳияти ва аҳамиятини юртимиз ва жаҳон жамоатчилигига етказиш, содда қилиб айтганда, биз кеча ким эдигу бугун ким бўлганимизни англаш, ватандошларимизни янги марралар сари руҳлантириш, биз учун энг улуғ, энг азиз айём бўлмиш Мустақиллик байрамини юксак даражада ўтказиш” кераклиги қайд этилган.

Ўзбекистоннинг мустақиллик байрами расман 1 сентябрь куни нишонланади, асосий тадбирлар 31 август куни бўлиб ўтади.