Икки нафарлик ўзбекистонлик Франциянинг Санъат ва адабиёт ордени кавалери нишонига сазовор бўлди

Жорий йилнинг  9 ноябрь куни Франция қароргоҳида бўлиб ўтган қабул маросимида Франция элчиси Франция Республикаси маданият ва алоқа вазири Флёр Пеллерин номидан ўзбекистонлик Зоиршо Кличев ва Толиб Низомовларга Санъат ва адабиёт ордени кавалери нишонини топширди. Бу ҳақида Франция элчихонаси хабар тарқатди.

“Буюк ипак йўлида карвонсарой” Франция-Ўзбекистон уюшмаси таъсисчиларидан бири бўлмиш Зоиршо Кличев меъморий ёдгорликларни таъмирлаш бўйича мутахассисдир. Мазкур уюшма Бухорода Истеза мадрасасини ҳамда иккита карвонсаройни таъмирлади. Истеза мадрасасида бугунги кунда маданият маркази фаолият юритмоқда.

Тошкент архитектура қурилиш институтининг собиқ ректори Толиб Низомов мазкур институт билан Версаль  архитектура олий мактаби ўртасида ҳамкорлик ўрнатилишининг ташаббускорларидан биридир. Бу ҳамкорлик доирасида ҳар иккала таълим муассасаси ўртасида талабалар ва профессор ўқитувчилар алмашинуви мунтазам равишда амалга ошириб келинмоқда.

Т. Низомов
Т. Низомов

Ушбу орден Францияда, шунингдек, бутун дунёда санъат ва адабиётнинг гуллаб-яшнашига қўшган хизматларини тақдирлаш учун французларга ҳамда чет эл фуқароларига бериладиган мукофотдир. Шу пайтгача икки нафар Ўзбекистон фуқаролари Наталья Мусина ҳамда Мариника Бабаназаровалар ушбу мукофот билан тақдирланган.